شارع الانسانية _العدد الثامن والعشرون

صاحى من النوم مش شايف قدامى مش عارف كلامى بصيت قدامى لقيت الشبشب بعد معاناة قمت غسلت وشى واتوضيت وصليت الصبح نزلت اجيب فطار من عند ابو العيا مطعمى المفضل افطار شهى كانك بتاكل يورانيوم مشع رجعت ضربت الموكا المعدة مش فاهمة اية اللى بيحصل

غفلت حبة حلمت حلم عجيب قلت لازم احكيهولكم

كنت فى زيارة لاحد الاقارب وراجع بليل راجع من حتة ضلمة حبة المهم ماشى ماشى ولا بيدى بشوط الطوب فى الشارع لانها هوايتى الاولى منذ الصغر والقمر مكتمل واذا بى بشوط طوبة راحت بعيد وخبطت فى حاجة وزى متكون صوت معدنى كانت على مرمى البصر لما قربت لقيتة صندوق حديد قديم بس مرسوم علية رسومات شدتنى حاولت افتحة قلت لا اخدة انضفة الاول فى البيت المهم روحت نضفتة والرسومات بانت اكتر مرسوم تنين كبير وواحد ماسك رمح وعاجنة وضاربة بية وربطة وشدة من قفاة

المهم بفتح الصندوق لقيت ورق عجيب اصفر اللون مرتب جداا واول ورقة مكتوب عليها تحذير للى هيقرا الورق لو فتحتة لازم تنفذ اللى جواة الورق شدنى اوى فتحت اول ورقة كلام عن القوى الخارقة للبشر وانها موجودة من زمان ومن ايام الرسول ودى حقيقة معروفة ان بعض الصحابة كانو يقراو الافكار او يتنبأو بالمستقبل وخلافة وفى اخر ورقة مكتوب لو قريت الورقة الصغيرة اللى فى الصندوق هتكونلك القدرة انك تسمع افكار الناس بدون كلام لمدة يوم بس فى نهاية اليوم هتقرا ضهر الورقة ولو خالفت التعليمات هتبقى ملعون لحد الممات

المهم قريت وش الورقة اللى كان لونها افتح من الورق التانى كلة وقلت دة اكيد تهجيص من عند عم خميس ونمت

قمت تانى يوم رايح اقضى مصلحة الروتين العادى فى الصحيان رحت للمطعم كنت بدات افوق شوية واصحصح بدى للراجل الفلوس لقيتة وهوا ساكت بيقول يعنى لما الزيت يغلى والفول والخضار والزباين مستغلية السندوتش بنص جنية ااكل عيالى منين انا اصل الافندية فاكرينا بنلاقى الفلوس فى الشارع ولا بنزرعهم فوق السطوح وهوا بيدينى الكيس لاقانى واقف ومبحلق لقيتة بيقول اية الاهطل اللى على الصبح دة شارب حاجة وجاى يقرفنا

الكيس يا بية بصوتة الطبيعى انا قلتلة الف شكر ومشيت مزبهل قلت ينهار اسود فى بينك الكلام طلع بجد انا سمعت الرجل بيتكلم من مخة وهوا ساكت اللة دى هتحلو اوى اما اروح اركب ميكروباص عشان الحق المصلحة

ركبت الميكروباص راكب جنبى السواق ووواحد شكلة موظف

سواق وسيم جداا لا اعلم لماذا معظم سواقين الميكروباصات يشبهون مهند بيسوق بصابعين بس وماسك كباية شاى فى ايدة وعمال يشرب وساكت

لقيتة بيقول هوا الواطى حموو دة لو مقلتلوش هات سجارة ميعزمش عليا ابداا اما عيل مش ولا بد

بصوتة الحقيقى يا حمووووو هوا مفيش حاجة علينا يا زميل حمووو فى صوت يشبة الكونترباص او خلاط المونة عنيا لابو نسمة بمسى على دقنك شعراية شعراية ويمد يدة بيسجارة ويعطيها للسواق وييرد علية الاخر كبريتك الحنين يعطية الكبريت من سكات اسمع حموو اللى بقى شبة دروجبا من كتر لطعتة فى الشمس يقول يعنى لا فطرنا ولا اتنيلنا ولسة مصطبحناش وبيقولى سيجارة اما سواق رزل اوى دحنا تانى عجلة اومال على الضهر يكون مخلص العلبة اللهى يحرقة بجاز

انا اقولة هات الباقى ومعاك المحطة

انزل وانا هتجنن

دخلت المصلحة كنت رايح اعمل قيد عائلى دخلت على الموظف المختص سلام عليكم لقيت نظارة كبيرة ومن وراها شبة وش انسان وسمعتة من وراء الجرنال بدون ميحرك شفايفة يعنى اية الاصطباحة دى كباية الشاى مش هنعرف نشربها وبصوتة العادى نعم اؤمر قلتلة عايز اعمل كزا قال بدون كلام اما نمرمطة حبتين وبصوتة الحقيقى بص يا افندى عندك ورقة برة مكتوب فيها الاوراق المطلوبة خلصها وتعالالى قبل الساعة 11 مع ابتسامة تشبة التيرانوصور وهوا يبتسم وبصوتة الداخلى مرة اخرى يلا يا اخويا عشان تبقى تيجى بدرى تعكر مزاجى منا هلاقيها منك ولا من الدولة اللى مقعدانا نشتغل لامثالك ونخدمهم عشان 200 جنية ولاد التيييييييييت دة مياكلوش فرخ حمام واقعد يكثر من التيييت انا خدتها من اصيرها ومشيت

نزلت اكمل الاوراق وكل ممشى اسمع اكتر الكلام متداخل :

انا لازم اكلم ابوها منا مش هفضل ادور على شغل لحد سن 30 دة شاب كان ماشى

و7شارع الانسانية واللة فكرة حلوة دة واد معدى اسمة عادل جنبى بيقول كدة انا هكتب المقال دة فى جريدة اتفووو واللة دة الكتابة دى حاجة حلوة خالص

ست ماشية يا رب الحق اروح الجدع لو جة ملقاش الغدا هيطين عيشتى

بنت شابة ماشية انا بحب تامر اوى دة رومانسى موت

ومن وراها بنت تانية انا لازم اجيب تقدير واكمل دراسات

وراجل بيقول ربنا على الظالم ربنا على الظالم يا رب عدينامنها على خير

طفلين معديين واحد منهم بيقول الواد رامز صاحبى فى المدرسة بيقول انة بياكل بيتزا انا لو قلت لبابا عايز اكل بيتزا ممكن يحطنى فى الدولاب يومين

واحد تانى ماشى يقول كان لازم يلعب باتنين مهاجمين انما مهاجم واحد لا اما متش النهاردة بتاع دورى الابطال هيبقى رهيب احنا فين من الكورة دى

الطفل التانى بيقول فاروق الباز كان امين عام الامم المتحدة ومشهور اوى انا لازم ابقى زية

بدأ الكلام يتكاثر فى مخى ويتداخل ورا بعضة

من كتر الكلام انا بدات ادوخ تقريبا اغم عليا

قمت من النوم وبعدين افتكرت الحلم اقعدت اسال نفسى سبحان اللة لو ربنا بجد خلى البنى ادمين كدة بيعرفوا يقروا الافكار دة كان يبقى شىء وحش اوى ويسبب مشاكل كتير واقعدت افتكر كلام الناس واحد واحد قلت ااهو كل واحد فيهم مش عاجبة حالة يعنى لو كل واحد حب ربنا ونفسة وكان عندة رضا بالمقسوم وفى نفس الوقت مش لازم يبقى بيقرا الافكار فى حاجة اسمها الفراسة مش لازم تبقى متمرن عليها عشان تقضى مصالح الناس ولا عشان تعبد ربنا كويس وتراعى فى تعاملاتك كلام ربنا وتنظم حياتك وحياة الناس معاك وتشغل ضميرك مترضاش للناس الا اللى ترضاة لنفسك. مش هيا دى الانسانية اللى احنا عايزينها وبنحلم بيها اظن محدش اتولد فينا عارف يعنى اية انسانية بس بفتكرها علطول اول منشوف العيوب اللى حوالينا والفساد واللى واللى اكيد كل واحد فينا عدى على شارع الانسانية بس يا ترى مين فينا فاكر هوا فين الشارع؟؟؟ واقعدت ادعى ربنا يا رب عدينا منها على خير ومننساش نفسنا ونتعامل بانسانية مع نفسنا واهلنا والناس اللى حوالينا اكيد الدنيا هتتغير

واخيرا

اتفوووووووووو على عديمى الانسانية والضميرر

بقلم محمد عادل