العدد الثلاثة و الثلاثون بين الحب والزواج ....

بين الحب والزواج .... خواطر فى مجتمع حائر

الحب..... اجمل علاقة بين اثنين , رجل وامرة شاب وفتاه زوج وزوجة

الحب .... نبحث عنه ام ننتظرة ؟ نجده ام يجدنا؟ كائن بداخلنا ام يتكون؟

الحب .... يامرنا فنطيع ام نامره فيرحل؟ يتحكم بنا ام نتحكم فية ؟

هل هو حاضر بداخلنا ام نستحضره ؟ هل له وقت ام فى اى وقت؟

هل هو وليد الصدفة هل يمكن أن نرغم أنفسنا على حب شخص ما؟

هل هو كافي لارتباط بين اثنين أم غير ضروري في زحمة الحياة وإيقاعها السريع؟

هل يكمن قياسه أم يكون بلا حدود ؟ كيف نشعر به ؟ كيف نعلم ان كان حقيقيا ام مزيف فى عالم أصبح كله مزيف, ضحكات مزيفة كلام مزيف مشاعر مزيفة تحكمها المصلحة

هل هو ضروري مثل الماء والهواء ام يمكن الاستغناء عنه؟

هل ياتى مع الوقت او التعود هل وجودك مع شخص ما لفترة ما يجعلك تحبه؟

كل هذه الأسئلة تدور فى رؤسنا وتحير مشاعرنا...... لكن للآسف أجابتها

لا اعلم !

ربما بعد انتهى من هذا المقال ربما أجد بعض الإجابات لبعض الأسئلة ولكنها لن تكون إجابات كافية

لان الإجابة الحقيقية هي التي سيجيبها كل منكم على نفسه و بنفسه

هي الإجابة التى سيقتنع بها كل منكم كل على حسب تجاربه وقناعته فى الحياة ومن وجه نظره

أنا اعلم ان كل إنسان عاقل يبحث عن الحب فى حياتة وكما هو واضح , لكى تبحث عن الحب يجب ان يتوافر شرطين ان تكون انسان وان تكون عاقل

غير ذلك ان لم تكن تفكر فى الحب او تبحث عنه فاعلم انك اما جماد او مجنون

وأنا عن نفسي إنسان وعاقل وبدور على الحب بجد ممكن يكون النصيب والقدر كانوا اقوى منى وحاولت ان اكون اقوى من القدر والنصيب رغم انه مستحيل لكن ده من خوفى لان لا أجد الحب مرة أخرى

الزواج..... أسمى علاقة شرعية بين رجل وإمرة اعتبره انا تتويج طبيعي لقصة الحب النقيه والاتى عادة للأسف لاتنتهى بالزواج لننا فى مجتمع يعترف حاليا بالماديات أولا

الزواج.... ضرورة للبعض على اعتبارات دينية ولآخرين على اعتبارات شهوانية او للبعض مجرد مصلحة؟

الزواج .... هل ياتى بعد الحب ام قبله؟

الزواج..... هل من الممكن ان تتزوج من إنسان لا تحبه و بكامل أرادتك لغرض ما فى نفسك؟

كل هذه الأسئلة تدور فى رؤسنا وتحير مشاعرنا...... لكن للاسف اجابتها

لا اعلم !

ربما بعد انتهى من هذا المقال ربما أجد بعض الإجابات لبعض الأسئلة ولكنها لن تكون إجابات كافية

لان الإجابة الحقيقية هى التى سيجيبها كل منكم على نفسه و بنفسه

هى الاجابة التى سيقتنع بها كل منكم كل على حسب تجاربه وقناعته فى الحياة ومن وجه نظره

فى عصر مليء بالتناقاضات فى كل ما حولنا هناك ايضا تناقض داخل كل منا , كل شاب او فتاه تربى وسط اسره محترمه يريد ان لا يصل به العمر ويضطر الى الزواج لحاجات اجتماعية او جسدية او لمجرد الا يفوته قطار الزواج وقطار الزواج بالتعبير الشعبي(يتأثر الفتى مرور العمر وعدد الاستقرار مثل الفتاة بالضبط ) وهذا هو التضاد هل يتزوج من اى فتاه يقابلها وعلى اى اساس يختارها هل يضع مواصفات فى قائمه من 1 2 3 شروط شكل ,عائلة, تعليم, مستوى اجتماعي

او الفتاة تقبل باى رجل يطرق بابها لمجرد انه عريس جاهز او ابن ناس او بابا وماما موافقين عليه

زى اى شاب عايز يتجوز ويكون أسرة ويستقل بحياته حبت اسمع نصيحة اعز اصدقائى وأجرب جواز الصالونات( جواز الصالونات اطلق علية كدة لان عارفين العريس والعروسة بيشوف بعض لاول مره فى بيت العروسه فى الصالون)

لكن دلوقتى وللتخفيف من الإحراج على الطرفين بيتقابلوا يعنى صدفة كده وكده بره فى النادي او فى مكان محايد لان من الممكن العريس يرفض او العروسة ترفض العريس لان أول حاجة يتحكم عليها فى الموضوع ده هى الشكل والى حد كبير بيكون اشبة بتاجر بيعاين البضاعة و كانه بيشترى جارية او تنظر هى الى العريس على أساس رجل المبيعات الذى يعرض نفسة كانه متقدم لمقابله فى وظيفة يلبس أحسن ملابس وأحسن عطر حتى توافق علية العروسة ومتطلعش فية غلطة وتكون اشبه بتقديم c v لابو العروسة عن مميزاته وإمكانياته ومن اول قاعد ويتفقوا مين ها يجيب ايه والفرح على مين

وفيها العريس بيصعب عليا قوى لان التفاوض على الماديات بيكون اشبه بالتفاوض بين فلسطين وإسرائيل لأنه بيكون وحده دون مناصر لو سأل العروسة معلش ممكن نجيب كذا ومنجبش كذا

ترد بكل برود: الشايفه باب صح

وانا فى رايه فعلا الشايفة باب بيكون صح لا ن هى تعرفك منين علشان تضحى علشانك يأهبل

بيكون ابو العروسة عايز العريس الشاب يبداء من حيث انتهى هو يعيشها فى نفس المستوى الذى تعيش فية الان يعنى يقارن بواحد اشترى شقة فى أفخم مكان فى مصر برخص التراب زمااااااااان ولاقى وظيفة ثابته بمرتب ثابت واعقد فيها على الاقل 25 سنه علشان يوصل للمستوى ده

عايز شاب الأيام دى يبداء كده يعنى يكون مولود فى فمه معلقة دهب وبابا مجهز له كل حاجة

وتشوف الطمع ان يكون عايزه بيحب البنت ويخاف عليها ويكون متدين ومحترم وماديات ممتاز طيب منين ده كلوا

ويقول الحاجة الوحيدة المضمونة دلوقتى هى الماديات

والبنت كمان عايز الشاب يجبلها كل اللى نفسها فية ويكون غنى ويعيشها فى مستوى عالى ويجبلها طباخة علشان مبتعرفش تطبخ ويكون برده بيحبها

حتى الشاب عند اختيارة اول حاجة بينظر لها البنت ألجميله

جميلة جدا وبرده الطمع تكون مؤدبة وبنت ناس ومتدينة وابوها عنده فلوس وتضحى علشان مادياته قليلة وتكون بتحبه

طيب ياعم مقابل ايه ده كله

اله يخربيت الكليبات بوظت عقول الشباب ويخربت مهند بتاع مسلسل نور بوظ عقول البنات

مع احترامى لكل الزيجات الناجحة بالأسلوب ده والتي ارجع نجاحها للأسلوب العملي جدا التى تمت به ولما لا تنجح وكل من الطرفين امسك بورقة وقلم وعدد مميزات وعيوب وماديات الاخر وأصبح هناك اتفاق لا خلاف علية فى تأسيس شركه على قواعد سليمة

المهم سمعت كلام صديقي عمرو والذي أكاد أن اجزم انه نفسه غير مقتنع بهذا المبداء وقلت اجرب يمكن اجد الحب فى جواز الصالونات

المهم حصل ورشح لى اخى عروسه , زميلته فى المدرسة ولأنه عارف انى معارض للمبداء ده ضحك عليا وقالي فى يوم اجازتى انه نسى ورق مهم ولازم احضر للمدرسة حالا

وهناك شوفتها او بمعنى ادق اخى تعمد انى اشوفها

وسالنى عن رائى وكان الحوار كالتالى

محمد : ايه رايك؟

حسن: فى ايه؟

محمد : اللى واقفه هناك , بنت مؤدبة وجميلة ومحترمه؟

حسن : so what? ( معلش اصل اخويا مدرس انجليزى ) بنت مؤدبه وجميل هل ده يكفى انى أتجوزها يعنى أنت تعرف ايه عن طباعها عن مشاعرها عن اى حاجة تانى

محمد : يابنى كل ده هيجى بس انت تعرفها فى فترة الخطوبة امال الخطوبة دى عملوها ليه

حسن : الخطوبة دى عملوها علشان كل واحد يبداء يتعود على طباع التانى بعد مايكون عارف مش لسة هايعرفها وبعدين فى الحالة دى كل واحد بيتعمد يبين احسن ما عنده يعنى تمثيل فى تمثيل

محمد ممازحا: طيب بلاش دى ايه رايك فى دى اللابسه ازرق الهناك دى بقى فلوس فلوس موز موز موز

بس فيها عيب بسيط مطلقة مرتين

: طيب بلاش دى ايه رايك فى الهناك دى بقى مفيش حد ميشى معاها الا وشكر فيها بصراحه

: اصلنا هجوزك يعنى هجوزك

يابنى حد لاقى حد كويس ومؤدب الزمن ده يابنى شوف البنات حواليك عاملين ازاى

حسن : ياعم انت عايز تخلص منى ليه

محمد : ياعم امك عايزه تفرح بيك

حسن : وانا مالى ياعم ماتفرحوا بعيد عنى

محمد : طيب اقعد معاها يمكن تلاقى فيها اللى انت عايزه

حسن : طيب افرض هى ملقتش فيا اللى هى عايزاه , يبقى يادار مدخلك شر يعنى

محمد : وبين البايع والشارى يفتح الله

حسن : يفتح الله ده انت بقيت مادى مادى يعنى على الرغم انك اتجوزت بعد قصة حب وبتنصحنى بكده وعمرو كمان اجوز بعد قصة حب وبيقولى برده مش فارقة ازاى يجماعة حد يفهمنى

محمد : لانها ممكن متفرقش ممكن تحول العلاقة بينك وبينها الى قصة حب جرب ومش هتخسر حاجة مانت مشهتفضل طول عمرك كده قاعد فى البيت وقرفنا

بس خلاص كفاية هزار نكلم بجد دى بنت بجد انا شايف انها كويسة ومناسبة جدا ليك

بعد تفكير وصلاة استخارة قلت لنفسى يمكن مجالات التعارف دلوقتى قليلة وبتقل مع زحمة الشغل والحياة وانا مبعترفش بالعلاقات الطيارى على النت هلاقى واحدة تفهمنى وتحبنى فين

لم امانع وكانت المقابلة فى احد الكافيهات بعد مكلمها محمد اخويا عن طريق مدرس زميلهم كبير فى السن وجارهم وهو الرشحها لى لانه يعرف اخلاقها كويس واجتمعنا كلنا وكنت رايح وانا فى داخلى صوت قوى يدل على عدم اقتناع بما افعل وبقول لنفسى ده حوار فاشل ازاى بس اخطب واحد ارتبط بها فى ثلاث او اربع قعدات معظمهم كلام رسمى ومجاملات ملهاش لازمة

لكن كان فى صوت تانى بيقول ان مشمهم اتعرفنا ازاى المهم نعرف بعض ازاى ان ممكن نفهم بعض ويكون ده النصيب اليوفقنا مع بعض واليكم تفاصيل ماحدث محاولا" الا اطيل عليكم

حسن : مساء الخير ازيك عاملة ايه؟

العروسة : مساء النور الحمد لله انت ازيك

حسن : طبعا أكيد محمد اخويا حكا لك عنى

العروسة : يعنى مش كتير هو بصراحة فأجنى وأنت حتى لما جيت المدرسة انا شوفتك بس مكنتش فاكراك قوى

حسن : طيب اوك احنا المفروض اننا نعرف بعض كويس ونفهم بعض طبعا انا مش عارف ازاى هوده هايحتاج وقت مش كده

العروسة : اه طبعا هو الاستعجال وحش فى الموضيع دى

حسن : طبعا ده مش قرار سهل ده قرار لعمر ومستقبل وحياة ولازم كل واحد يكون مقتنع بالقرار اللى هايخذه

حسن : طيب انت تحبى تعرفى ايه عنى او ايه اهم حاجة عايزة تعرفيها عنى او مواصفات فى فتى احلامك؟

العروسة : ابدا والله ولا حاجة هو ماستر محمد حد كويس ومتدين وانا عارفه وانت اكيد علشان اخوه اكيد زيه

حسن مبدى تعجب : بس مش شرط ممكن اكون مختلف كتير عن محمد وانا فعلا مختلف عنه كتير

العروسة (بصراحة وجرة لم اراها من قبل على اى فتاه ) : طيب هو اهم حاجة انى ارتبط بشاب يكون كويس وابن ناس ومتدين ومادياته تكون كويسة

حسن وقدت بدت على علامات تعجب اكثر: طيب كويس وابن ناس متدين لكن يعنى ايه مادياتة كويس مش فاهم

العروسة : مش قصدى ان يكون غنى لانى عارفة يعنى دلوقتى ظروف الشباب عاملة ازاى بس يكون فى المعقول مش واقع يعنى اللى هو الدنيا ضايعة معاه وبهدلة وكدة لا يعنى يكون فى المعقول يعنى

طبعا انا استغربت قوى من الرد واتلخبت وبقيت مش عارف اعلق واتعدلت فى القعدة وحاولت اركز اكثر فى الكلام انا عارف ان من حق اى بنت تطمن على مستقبلها بس مش كده المهم

حسن : طيب فى حاجات تانى فى مواصفات فتى احلامك غير كده يعنى مثلا بخيل مش بخيل عصبى مش عصبى يعنى اى حاجات تانى يعنى

العروسة : لا والله هو لو متدين مش هيكون فية الصفات دى ليه هو انت بخيل ولا ايه

حسن : لا مش قصدى انا بكلم بصفة عامة

وبصراحة بقيت مش لاقى كلام اقولة انا حسيت انى مستضيف واحدة فى برنامج على قناة المحور وبنتناقش فى قضية عامة مش واحد متقدم لبنت هيرتبط بيها والمفروض هيكون بينهم مشاعر حلوه بعدين

انا عارف ان مش هيكون من اول قاعدة مشاعر بس على الاقل متكنش جافة اقوى كدة وياريت على كدة وبس

تطرق الحديث فى اسئلة كتير منها مثلا

العروسة : ماستر محمد قال لى انك عندك شقة

حسن : ايوه عندى بس مساحتة محدقة كده على قدى يعنى

العروسة : ايه مساحتها قد ايه يعنى

حسن : هتفرق كتير معاكى

العروسة : لا.... يعنى ... مش للدرجة هى بصراحة تفرق قدام مش دلوقتى طيب انت ليه ماجبتش شقة اوسع من كدة شوية

حسن بتريقة وعصبية واحسيت انى عايز اقوم واقلب الترابيزا على دماغها لولا خايف على احراج اخى: والله الفكة اللى معايا مكفتش ههههه

وحطيت رجل على رجل وتقمصت شخصية وكيل النيابه وعرفت انها خربانه خربانه

حسن : طيب قولى لى بقى انتى حبيت قبل كده فى حياتك

العروسة :اية السؤال دة انت بتحقق معايا

حسن ضاحكا : يعنى طالما انا حاسس انى فى قناة المحور ( وانقلبت القاعدة من هذة اللحظة الى هيستريا ضحك بينى وبينها لا اعلم كيف)

العروسة : لا والله يعنى هو فى ناس اتقدمولى كتير وانا رفضتهم

حسن: ورفضتيهم ليه

العروسة : يعنى رغم ان فى واحد منهم ماديته كويسة وعنده فلا فى اكتوبر بس يعنى كانت اخلاقة شوية يعنى

حسن : طيب يعنى ممكن يكون فيه حاجة بيننا قدام فى المستقبل

العروسة : حاجة زى ايه يعنى قولى فى 1 2 3

حسن وانا محرج وكنت بحاول المح للمشاعر: يعنى دى مفيهاش 1 2 3 دى حاجة بتتحس

العروسة : يعنى ممكن مع الوقت والعشرة والتعود

وفكرتنى بفيلم عن العشق والهوى بمنه شلبى لما قالت ان العشرة والتعود ممكن تكون بديل عن الحب

العروسة : طيب انا سمعت انك فى البنك الاهلى وسمعت ان البنك الاهلى فى مزايا كتير

حسن مقاطعا : بس استوب احنا كده داخلين فى دور قر وانا مابحبش كده لو عايز تشتغلى فى البنك انا مستعد اقدم لك

العروسة : والله هو ينفع

حسن : حلو قوى كده يامعلم طيب كنا اتقبلنا لية كنت ابعتيلى الcv وانا اقدملك

العروسة : لا والله مش الفكرة

انا قلت فى عقلى يمكن الاحراج وهو اللى لخبت الدنيا

وحاولت اوازن الامور واتكلم جد شوية علشان مظلمهاش يمكن تكون البنت بتدور على نفس اللى بدور علية بس لانها عارفة ان ده جواز صالونات والماديات هى اساسه

حسن : طيب انا هاقولك على حاجة مهمة بالنسبة لموضوع الماديات ده رزق فهمانى يعنى ممكن النهاردة تبقى الدنيا بتضحك والحياة وردى وفلوس وبكره اسيب البنك لا ى ظرف البنك فلس اوانا غلط غلطة تكلفنى وظيفتى لانى بشتغل مخاطر مش حاجة سهلة فبلاش تحسبيها كدة

فؤجت برد الفعل

العروسة : ايه ده هو انت عقد ولا تعين ماستر محمد مقليش

انا وقعت على الارض من كتر الضحك وهى لسة بتسال انت بتضحك ليه وانا مشقادر امسك نفس من الضحك

يعنى هو فى كده ياربى

قلت ارمى اخر كلمة قبل مامشى وانا بقيت متاكد من رد الفعل لكن قلت اقولها

حسن : طيب لو لقدر الله اتجوزت اى حد مش لازم انا وحصل انا مادياتة وقعت فى فترة لاى سبب مشروع وخسر شغل واتصفى ايى سبب هتعملى اية

العروسة : طبعا الحياة مش كلها حلوه اكيد فى فترة بيبقى فى الدنيا مش قوى

بس طبعا يبقى لفترة مؤقتة مش علطول يعنى

حسن : لفترة مؤقتة والله يا انا بشكرك جداجدا جدا اولا على صراحتك انا مشفتش حد صريح قوى كدة وبجد برافوا على صراحتك دى ميزه مش موجوده فى اى حد كان ممكن اكمل على شانها ثانيا انك اكدتى لى مبداء ان جواز الصالونات ده مشروع فاشل ثالثا انتى حد عملى جدا وده اللى ينفع فى الزمن ده ربنا يكرمك

العروسة : عملى ازاى يعنى

حسن : يعنى بتحبى تحسبيها صح تعيشيها صح ههههه

وانهيت المقابة رغم ان فى تفاصيل اكثر تجعلنى مدخلش تجربة زى دى تانى لا مش هاكون سعيد فى حياتى وانا حاسس ان الست دى اتجوزتنى لمجرد حد مناسب ليس اكثر

وقلت لها علشان الاحراج انى هاصلى صلاة استخارة وارد عليها

انتهى القاء ورغم ان عرفت ان الاستاذة المربية الفاضلة وافقت عليا الا انى اكيد رفضتها وبكل فخر رغم انها كانت جميلة فعلا لكن ده فعلا مش سبب كفاية يحسسنى بالامان مع واحد هاعيش معاها بقيت عمرى

طبعا انا عارف ان الناس كلها مش كده وان ممكن العروسة دى نفسها تضحى باى ماديات وتعيش انشالله فى عشة وتاكل وجبة واحدة فى اليوم بس لو حبت حد ممكن تضحى بكل حاجة علشانه وهو كمان ممكن يشتغل 48 ساعة فى اليوم ويوفر لها كل حاجة علشان يسعدها لكن هى اتكلمت كده لان مش انا الشخص الذى يمكن ان تحبة وتضحى من اجله ولذلك كان الموضوع مجرد صفقة واوفقت لما حسبتها ان ممكن اكون احسن اللى تقدمولها وعلى حسب تعبيرها اه مش غنى قوى لكن معقول

معقول نوصل للدرجة دى من التفكير معقول حياتنا تكون اساسها الماديات او حتى ان اتجوز لمجرد ان عايز اتجوز وخلاص ومش مهم بحب او مبحبش واقول الوقت والعشرة واى كلام فاضى مبيحصلش هيكون بديل عن اسمى علاقة فى الوجود

انا بطبعى مش متشائم وعارف ان ربنا بيكرم الناس كلها وان الزوجة قسمة ومكتوب لك من قبل ما تتولد وعلشان كده فى

عشاق كتير اتقابلو عادى مكملوش (عمرو دياب)

لانهم فعلا مش لبعض

لكن شوية عقل مع شوية مشاعر لا عقل بس ونعيش كاننا جماد

ولا مشاعر بس ونندم بعد كده

يعنى حبه صبر حبة حنان يبقى الحلم صورة وصوت(محمد منير)

اقولك على حاجة انا حاسس ان عامل زى اسامه منير مع انى بكره موت

بس بجد اوعى حد فينا يتخلى عن حلمه ويدور وهيلاقى الحب حتى لو صالونات ممكن يكون فى واحدة بتفكر نفس تفكيرى ومستنيه بس الفرصة تيجى وترتاح لحد وتحس ان ربنا قدر لها ده وممكن تفهمة وتقدرة وفعلا تضحى باى حاجة علشانة

الحب موجود وهو كائن بداخلنا ممكن احنا بقصد او منغير قصد نموته لكن ممكن غصب عنك يحيا تانى جواك

افتكر معايا ان حتى اشر الناس ظهروا على وجه الارض كانوا بيحبوا هتلر كان بيحب نابليون كان بيحب جورج بوش (والله انا شاكك ) بس اكيد كان بيحب الكلب بتاعه

الزواج ابسط من كده بكتير يجماعة ده الحيوانات طلعت ازكى مننا مجرد قط يعجب بقطه فيقرروا يكون اسرة ويسعدوا بعض

وطاوس يعجب بطاوسة فيرقص لها فرحا لكى تقبل بزواجة

عمرك شوفت دب رفض دبه علشان تخينة شوية

او قرده رفضت قرد علشان مش شغال شغلانه ثابتة

او كلب مصرى اتجوز كلب المانى علشان ياخذ الجنسية

انا عارف ان الشرع والدين بيقول ان الجواز رؤيه شرعية

لكن النبى عليه الصلاة والسلام ايضا درب لنا اسمى واشرف علاقة حب على وجه الارض مع السيدة خديجة

كان علية الصلاه والسلام افقر منها (وكان يقول او ترضى بى)

وكانت تحبة حبا جما وتتمناه ولكن حيائها يمنعها

عليك افضل الصلاة والسلام وعلى ال البيت

يعنى حتى المتدين مش كلمة كدة بتتقال تزويق للكلام لا المتدين برده ميتجوزش الا لما يحب او على الاقل يميل قلبة

لان بجد الوقود الحقيقى لاى حياه هو الحب

لو لم يكن الحب ضرورة لما خلقة الله

ومن نعمة الله علينا ان جعل لنا حب فطرى وهو اجبارى مثل حب امك وابيك لك واخوتك وهذا لكى تستقيم الحياة

وجعل ايضا حب اختيارى وهو احساس يصلك وانت بكامل ارادتك تقرر ان تعيش حياتك تسعد شخص ما فقط لأنك تحبه

فى النهاية بقول مينفعش نتخلى عن حلمنا

واتفووو على من تزوج ولم يحب

واتفووو على من حب ولم يقاتل من اجل حبه

بقلم حسن فتحي