كرومبو كرومبو مع المفتش كرومبو
أمبارح كنت عند مدام سبيط بتاعه البيض وقالتلى يا كرومبو انا اتسرق منى الحلق الألماظ بتاعى ممكن تشوفلى مين اللى سرقه وانحسر شكى فى تلاته بس المعلم منصور ابو ليا والاستاذه معلش ام ايدين كاوتش والاستاذ هكذا ابو فروه مركزه ولما سالت المعلم منصور ابو ليا قالى حلق ايه اللى انت جاى تقول عليه
ولما سألت الاستاذه معلش أم ايدين كاوتش قلتلى حلق ايه يا كروبمو انت عارف انا بنت مين ياض يا بن المضايقه ولما سألت الاستاذ هكذا ابو فروه مركزه قالى ايوه انا اللى سرقت الحلق
انا عرفت مين اللى سرق الحلق لو انت كمان عرفت ابقى اتغطى بليل كويس عشان ماتخدتش برد يا عبيط
لو عندك مشكله وعيز تتكلم فيها مع حد ممكن تتصل بينا واحنا هنحليهالك ساعات بنحب نتكلم بس مش بنعرف نفضض مع حد أتصل بيا وسيب مشكلتك وانا هاحلهالك ولو أتصلتوا من الساعه 12 لحد2 بليل هارد عليكوا بنفسى ونتكلم فى كل اللى انتوا عايزيونه.......سماح انور
يا سلام يا عم الحج هتصل انا بسماح أنور عشان تحليلى مشاكلى هو ده الكلام الطاهر أتصل بواحده كانت ممسوكه قبل كده فى فى قضيه مخدرات و مش حشيش ولا هروين لأ بانجو يعنى دماغ بوابين ودى بقى تبقى ايه نوع المشاكل اللى أكلمها فيها؟يعنى أسئلها مثلا الباكيته بكام ولا أيه احسن مكان أسكور منه ولا ممكن أسألك يا مدام سماح هو الويد ريحته وحشه ليه؟
وبعدين ايه لو اتصلتوا من الساعه 12 ل2 هارد عليكوا بنفسى ونتكلم فى كل حاجه عليا النعمه بتفكرنى بفيلم ثقافى أحنا بنات عائلات محترمات اتصل بينا على الارقام دى واحنا هنريحوك
اتلمى يا وليه وأقعدى فى بيتك مانتى مش لاقيه اللى يلمك والله العظيم
مساء الفل على كل مشاهدينا أهلا بيكم فى برنامجنا اللى ماليان جوايز وفلوس لو عايز تحقق حلمك لو عايز تكسب فلوس لو عايز تجيب عربيه يلا اتصل بينا واحنا هنحققلك حلمك أتصل دلوقتى وانت تكسب على طووووووووووول
الاعلان ده بشوفه كل يوم كل دقيقه كل ثانيه على كل القنوات تلاقى مذيعه من اللى هما عندهم تسلخات دول ومش واقفين على بعضهم و شكلها أصلا من اللى بيبقوا واقفين تحت عواميد النور فى شارع الهرم
وعماله تتمايع على الشاشه وتدلع قلت اشوف الناس دى بتقول ايه وتخيلت المخرج بيقولها ايه فى السماعه اللى فى ودنها
المذيعه:عايز تكسب؟عايز تربح عايز تتجوز عايز تحقق أحلامك عايز عربيه عايز شقه يلا اتصل بينا وانت تكسب على طول
المخرج:ماتدلعى شويه يا فايزه خلى الناس تتصل
المذيعه تدلع أكتر على الشاشه طيب يلا اتصلوا والسؤال بتاعنا ماهى جنسيه الاعب المصرى حسام حسن؟ اللى يعرف الاجابه يتصل بينا على الارقام اللى على الشاشه عشان تكسب 5000 دولار ايوه 5000 دولار مستنى يلا اتصل وانت تكسب على طول قوم أمسك سماعه التلفون واتصل على الارقام بتاعتنا اخوتنا اللى فى المغرب والسعوديه وتونس اتصلوا على الارقام اللى على الشاشه وانتوا تكسبوا معانا 5000 دولار
لقيت البت عمال تتكلم بسرعه رهيبه وكأنها واخده لبوسه من بتوع السخونيه .متكهربه وكأنها هتبوس رجل المشاهد انه يتصل البت مش واقفه على بعضها والموسيقى اللى شغاله وراها عمال تزيد والكاميرا عماله تقرب وتبعد عنها وفجأه يجى اتصال
ومعانا اتصال تلفونى ونقول الووووووووو
المتصل:الو
المذيعه:مين سعيد الحظ اللى معانا
المتصل:محمود عضمه من مصر
المذيعه:أهلا بيك يا محمود يا ترى عارف اجابه السؤال اللى معانا
محمود:طيب معلش ايه السؤل؟
المذيعه:ماهى جنسيه اللاعب المصرى حسام حسن؟
محمود:مغربى؟؟؟؟
المذيعه:للأسف يا محمود اجابتك غلط معلش أتصل مره تانيه وممكن تكسب معانا
يا نهار ابوك اسود مغربى انت عبيط ياض ولا ايه؟ده ايه العالم المعاتيه دى يا ربى
المذيعه:ومعانا اتصال تانى ونقول الو؟
المتصل:الو
المذيعه مين معانا؟
المتصل:ابو رياض من السعوديه
المذيعه:أهلا بيك يا ابو رياض وبكل اهالى السعوديه؟
ابو رياض:اهلين يا ست البنات
المذيعه ابو رياض السؤال بيقول ماهى جنسيه اللاعب المصرى حسام حسن؟
ابو رياض:سودانى
المذيعه:معلش يا ابو رياض الاجابه غلط اتصل مره تانيه عشان تفوز معانا ب5000 دولار
أرفض حدوث هذا (وطبعا الشباب فاهمين اختصار الكلمه دى ايه؟)؟ سودانى مين ياعم الحج انت واقف فى مقله ولا ايه؟
المذيعه:ايه يا جماعه السؤال بتاعنا سهل جدا طيب انا هاسهلكم شويه
تسهلى ايه يا وليه؟
المذيعه:الاعب حسام حسن من اب وام مصريين يلا بقى اتصلوا بينا عشان تكسبوا الجايزه بتاعتنا ومعانا اتصال ونقول الو
المتصل:الوووووووووووووووووو
المذيعه:مين معانا؟
المتصل:والله انا نوف من الامارات
المذيعه:أهلين نوف وبكل اهل الامارات
نوف:انتى جميله اوى وانا بحبك وايد
المذيعه :ميرسى يا نوف
المخرج:ميرسى؟؟؟الله يرحم ابوكى كان بيركب الحمار ويبدل يا بت
نوف:ممكن أخد نمره جوالك حتى أحكى معكى ها الحين؟
المذيعه:مش هاينفع على الهوا يا نوف بس ممكن تجاوبى على السؤال بتاعى وانا هاكلمك بعد الهوا؟
نوف:وايش السؤال؟
المذيعه جنسيه الاعب المصرى حسام حسن؟
نوف:أحبج أحبج يا عيونى
توووت توووت
المذيعه :واضح ان الخط اتقطع معلش يا نوف اتصلى تانى عشان تربحى يلا اتصلوا دى الجايزه كبيره
المخرج:ماتتمرقعى شويه يا بت خلى الناس تتصل الله يرحم ابوكى كان بيشرب البيبسى فى القله
المذيعه فجأه تلاقيها تروح رقصه بلدى على المزيكا اللى شغاله
وعماله تتكلم وهى بترقص
يلا اتصلوا والنبى اتصلوا امانه تتصلوا هوبا اتصلوا طيب اعريلكم كتفى هوبا يلا هوبا يلا
ايه المذيعه الواطيه دى؟
المذيعه:ومعانا اتصال تانى ونقول الو؟
المتصل:يا اهلين؟
المذيعه:يا هلا بيك مين معانا
المتصل:عبد القاد من البحرين
المذيعه اهلا بيك يا عبد القادر وبكل اهل البحرين عارف اجابه السؤال؟
عبد القادر:اه بعرف ولكن لى سؤال؟
المذيعه ايه يا عبد القادر؟
عبد القادر:كام حج الليله ؟
المذيعه:ايه يا عبد القادر؟
عبد القادر:حج الليله تبعك كام؟
المذيعه مش فاهمه يا عبد القادر تقصدايه؟
المخرج:يعنى الليه بكام يا هبله انا هاقطع الخط
والله برنس يا عبد القادر شكلك قادر يا عبد القادر
المذيعه:واضح ان الخط قطع مع عبد القادر مستنيين اتصلاتكم على تلفوناتنا اللى بتظهر على الشاشه قدامكم دلوقتى يلا اتصلوا عشان تكسبوا ال5000 دولار لسه ال5000 دولار مسنينك يا سعيد الحظ يلا اتصلوا بقى طيب يلا اتصلوا عشان خاطرى وحياه امكوا لتتصلوا طيب أمشيلكوا على الحيط؟ ومعانا اتصال تلفونى ونقول الوووووووو
المتصل:الوووو
المذيعه:مين معانا
المتصل خالد من الجزائر
المذيعه أهلا بيك يا خالد وبكل اهل لجزاير عارف اجابه سؤالنا
خالد:طبعا
المذيعه طيب ايه الاجابه يا خاااااااااااااالد
خالد:البطيخه
البطيخه يا بن القرعه حمرا يا خالد............ولا قرعه
المذيعه:غلط يا خالد معلش اتصل تانى وممكن تكسب يلا كثفوا اتصالتكم معانا
المخرج:ارفعى
المذيعه يبان عليها علامه الاستغراب والدهشه شكلها مش فاهمه
المخرج:أرفعى الجايزه يا غبيه
المذيعه تستدرك الامر
المذيعه: والمخرج بيقولى ان الجايزه زادت معانا من5000 دولار لاتنين مليون جنيه لأول متصل معانا يلا بقى اتصل والحق عشان تكسب الجايزه يلا اتصلوا اللهى امك تحج تتصل اللهى مايوقعك فى زنقه اتصل وحياه خالتك محاسن للتتصل طيب أطلعلكوا نار من بوقى؟؟ اتصوا بقى ومعانا اتصال يا ترى مين سعيد الحظ ونقول الووووووووو
المتصل الووووو
مين معانا
المتصل:فوذى من بولاق
المذيعه وهى مرتبكه جداوكأنها اتكهربت لما سمعت الاسم والمنطقه وبنبره خوف قالت:أهلا بيك يا فوزى وبكل أهل بولاق
فوذى :انتى مش فاكرانى يا بت الله يرحم ايام بير السلم ده انتى كنتى الراعى الرسمى لبيوت الشباب يا فايقه أحبك يا فايقه وانتى مضايقه
تووووووووت
المذيعه واضح ان الاتصال اتقطع
أصلى يا فوزى والله يا مكتر من الفضايح وانت رايح احبك يا فايزه لما تبقى عايزه
المذيعه يلا يا جماعه يلا اتصلوا انا صوتى راح حرام على ايمانكم اتصلوا بقى طيب اعملوكوا ايه؟طيب اعملكوا مهلبيه؟
ومعانا اتصال ونقول الو
المتصل السلام عليكم ورحمه الله وبركاته
المذيعه اهلا بيك مين معانا
المتصل بهيج
المذيعه نعم؟
المتصل بهيج رأفت من اسكندريه
المذيعه أهلا بيك يا بهيج وبكل أهل اسكندريه
بهيج:أهلا بيكى
المذيعه عارف جابه السؤال؟
بهيج: ايون
المذيعه:ايه الاجابه يا بهيج عشان تكسب الجايزه بتاعتنا
بهيج: البيض
المذيعه نعم؟
بهيج :البيض البييض البييييييييض البييييييييييييض البيييييييييييض يا ولاد الكلب
تووووووووووووت
المذيعه واضح ان الاساذ بهيج اتجنن باين ولاايه؟
ههههههههههه يا بن اللعيبه يا بهيج
المذيعه:يلا اتصلوا بقى قبل ما الحلقه تخلص والجايزه لسه موجوده ومحدش هيكسب ولاايه؟
لقيت نفسى تلقائيا بمسك سماعه التلفون وبتصل بيها رد عليا الانسر ماشين
اذا كنت تريد الاشترلك فى مسابقه الاحلام الورديه أضغط على نمره واحد
رحت ضاغط على نمره واحد
الانسر:أهلا بيك فى مسابقه الاحلام الورديه اللى بيها ممكن تكسب جوايز كتير اوى وتحقق كل احلامك ورغى رغى رغى وفى الاخر خالص ماوصلتش لحاجه خالص وقالولى انت كده سجلت اسمك واحنا هنبقى نتصل بيك لو الكومبيوتر اختارك واتكلمت بتاع 7دقايق كده حسبتها مع نفسى لقيت 7*1.5 جنيه الدقيقه يعنى بتاع عشره جنيه فى عشره تلاف متصل من كل انحاء العالم يعنى 100000 جنيه يوميا يا بلاش والله وطبعا الناس اللى بتتصل دى اغلبهم متفقين معاهم انهم يجابوا الاجابات الغبيه دى عشان يستفزوك وتتصل وبين كل 100 متصل يتصلو بواحد من الناس العاديه حتى لو كسب الجايزه 5000 دولار يعنى كام يعنى 25000 جنيه يبقى هما كسبوا فى يوم واحد 75000
الف بلبل حته واحده طلع منهم بقى اجره الاستوديو والمخرج والمذيعه وحق ايجار النمره وقول يعنى فى اليوم بتاع 25
الف جنيه يا بلاش والله
وانا غارقان فى حسبتى دى لقيت التلفون بتاعى بيرن برد لقيت المذيعه بتقول ومعانا اخر اتصال تلفونى ونقول الوووو
انا:الوووووو
المذيعه مين معانا
انا:عمرو سامى
المذيعه:منين يا عمرو
انا:من بلد الغلابه
المذيعه:أهلا بيك وبكل أهل بلد الغلابه يا ترى عارف الاجابه؟
عمرو سامى:بصراحه لأ بس انا عندى اجابه لحاجه تانيه لو تسمحيلى
المذيعه خير يا استاذ عمرو
عمرو سامى:فيه مرهم اسمه كينا كومب ممتاز للتسلخات
تووووووووت تووووووووت
ايه البرامج اللى تجيب عقم دى؟ايه البرامج اللى بتحسسنا اننا عالم ساذجه هل هو استخفاف بعقليتنا كبقر عايشين ناكل فى البرسيم يعنى؟معقوله فيه عالم هبله بنت هبله بتحل الكلام الفارغ ده؟الناس بتفرح لما تلاقى نفسها عارفه الحل بتاع المسابقه؟ايه الخيبه والعبط ده؟ايه اللى وصلنا لكده ايه اللى يخلى احلامنا بتحقق من خلال اتصال تلفونى ليه عايزين نصدق الوهم عايز شقه اتصل بينا عايز عربيه عايز شبكه عايز عروسه عايز لبوسه عايز خلاط عايز مروحه عايز غساله عايز فلوس عايز تشتغل عايز تتشهر عايز رغيف عيش عايز ايه ولا ايه من اساسيات الحياه اللى بقينا مش لاقينها؟ طيب انا هاكيلكوا على حاجه حصلت معايا كده من أسبوع تقريبا لقيت ميسد على الموبايل عندى من نمره دولى قلت يا سلام يا بو عمرو شكلها لعبت يا واد ودى شركه بترول بقى من بلاد بره وبيتصلوا بيك وانت نايم فى الدره يلا ياض قوم كلمهم وفعلا ذى الشاطر كده رحت واخد بعضى وجيبلى كارت من ابو خمسين وشاحن ومتصل لقيت أنسر ماشين بيرد عليا وصوت كده عامل ذى بتاع الاساطير يقولى ايه بقى مرحبا بك فى عالم العلاقات؟ يا نهار أسود عالم مين يا حج؟ أذا اردت ان تدخل غرفه الحب اضغط رقم واحد اذا اردت ان تدخل غرفه الجنس اضغط رقم اتنين؟أقسم بالله تنحت ايه الاباحه دى؟ مشأقفل السكه بقى وأحترم نفسى لأ رحت دايس على رقم اتنين بعيد عنك يا خويا سمعت صمت رهيب؟؟قلت مساء الخير يا جماعه؟محدش رد قلت هى الاوضه فاضيه ولا ايه؟ياخونا يا بتوع الغرفه؟محدش عبرنى بعد كده جالى صوت بتاع الاساطير قالى للخروج من الغرفه اضغط رمز لشباك رحت دايس على شباك وقلت بقى المره دى هادخل غرفه الحب؟رحت دايس على واحد مساء الخير يا جماعه؟ صمت رهيب؟مساء الخير يا بقر؟ محدش بيرد؟مساء الخير يا ولاد الكلب الكارت هيخلص؟ محدش معبر أهلى وفجأه سمعت الصوت الاسطورى نأسف حيث أن كل الغرف فارغه الان ابقى تعالى وقت تانى؟؟؟كان ناقص يقولى يا أهبل؟؟أيه الحوار بقى أقولكم بقى انا ايه الحوار الشركات دى بتخش على شبكات المحمول بتاعتنا وتاخد منها نمر الموبيلات وتديك ميسد طلعت أهبل ذى العبد لله كده واتصلت خير وبركه كل دقيقه أنت بتتكلمها هما بياخدوه عليها فلوس وهكذا لما عملت سيرش على الكود بتاع الدوله دى لاقيتها ليتوانيا؟قلت يا نهار أسود هو الصيت بتاع السذاجه بتاعتنا وصل للتوانيا كمان؟طيب ايه اللى خلا الاخوه الليتوانيين يوصوا بفكرهم أن العرب ممكن يتصلوا؟؟؟؟؟اللى عرفنى الحوار ده على فكره واحده هنديه اتعرفت عليها من 5 سنين كدهوكانت شغاله فى كول سنتر فى الهند وأول معرفتى بيها كانت اشتغاله برضه ذى كده بس بعد كده نشأت بينا علاقه حلوه؟بعتلها الحوار وفهمتنى الليله كلها.طيب دول خواجات ولاد خواجات انما بقى اللى هنا دول بيعملوا فينا كده ليه؟ بيلعبوا على وتر واطى زيهم أحلامنا البسيطه اللى بقت من المستحيلات ايه اللى خلانا عايزين ثروه تقع على دماغنا من السما فى مكالمه تلفون او ايميل اهبل يجيلك يقولك انت كسبت اللوتاريا انا أعرف واحد عمل نصبايه جميله اوى بعت ايملات لناس كتير اوى وقالهم انا معايا سر يخليك تكسب مليون جنيه فى ظرف شهر واحد ابعت على رقم التلغراف ده 5 جنيه بس وهيجيلك جواب على البيت فيه السر وأقسم بالله هيجيلك جواب ولو عملت اللى فيه هتكسب المليون جنيه فى ظرف شهر بالكتير ولما الناس بعتت الخمسه جنيه على التلغراف فعلا جالهم جواب مكتوب فيه عارف تعمل مليون جنيه اذاى فى ظرف شهر؟؟؟أعمل ذى ما انا عملت؟؟؟؟يا سلام عايز عربيه اتصل بالنمره ديه عايز شقه اتصل النمره ديه عايز فلوس النمره ديه عايز نفوذ النمره ديه عايز اى حاجه النمره ديه بمنتهى البساطه كده يا سلام ؟طيب ايه اللى خلاهم اصلا يفكروا ان فيه ناس هتتصل وتسنى تكسب ومصدقه انها هتكسب طيب لو كسبت؟الفلوس دى حلال ولا حرام؟؟؟؟تعبت فيها وشقيت بيها عشان توصلها يعنى؟اللى خلاهم يعملوا كده انهم متأكدين اننا خلاص بقينا بنتعلق بأى قشايه ذى الغريق عشان نحاول نحقق احلامنا بس مين السبب فى ده كله؟ مين السبب فى ضياع أحلامنا وخلاها ماده تسويقيه؟مين السبب فى احباطنا وخلانا عايزن فلوس من السما؟مين السبب اللى خلانا مش عايزين نشتغل ولا ننتج ولانصنع ولا نعمل اى حاجه فى دنيتنا غير اننا نشوف الكلام الفارغ ده فى التلفزيون ونسمعه فى الراديو وبس؟
عايز تعرف مين السبب؟
أتصل على 0900 وجاوب على السؤال ده واحنا نقولك مين السبب؟ عشان تكسب جايزه الخابور الذهبى
يا ترى اسم الجريده بتاعتنا ايه؟
1-اسفخس عليك وعلى شكلك
2-الديك فى العشه
3-اديك فى الجيركن تركن
4-أتفوووووووو
بقلم عمرو سامي
No comments:
Post a Comment